Xəbərlər

Süveyş kanalı genişləndiriləcək

Misir Süveyş kanalını genişləndirəcək.

AnTv.az xəbər verir ki, bunu CNN-ə açıqlamasında Süveyş Kanal İdarəsinin rəhbəri Üsame Rabi deyib.

O bildirib ki, bənzər qəzaların baş verməməsi üçün bu qərarı alıblar.

“Kanalın dərinliyi 24 metrdir və daha çox dərinləşdirilməsinə ehtiyac yoxdur. Genişləndirmə işləri kanaldakı hərəkətə mane olmayacaq”.

Qeyd edək ki, bundan əvvəl martın 30-da Misir Prezidenti Əbdülfəttah əs-Sisi kanalın genişləndirilməsinin mümkünlüyünü demiş, bu işi mütəxəssislərin ixtiyarına buraxdığını əlavə etmişdi.

Xatırladaq ki, Çindən Rotterdama yola düşən, 400 metr uzunluğa və 224 min ton yükgötürmə qabiliyyətinə malik olan “The Ever Given” konteyner gəmisi martın 24-də kanalın 151-ci kilometrliyində saya oturaraq, hərəkətin dayanmasına və yüzlərlə gəminin kanalın girişində tıxac yaratmasına səbəb olub.

Altı günlük çalışmalardan sonra gəmi üzdürülüb, kanalda hərəkət bərpa edilib. Ancaq Misir bu müddətdə ciddi maliyyə itkisi ilə üzləşib. Belə ki, kanalın bağlı qaldığı hər gün bu dövlətə 10-15 milyon dollar başa gəlib.

“The Ever Given” adlı gəminin sahibi olan yapon şirkəti səfərlərin ləngiməsinə görə ticarət gəmilərinin operatorlarından üzr istəyib.