Siyasət

Rusiya polisi Taleh Bağırov üçün mahnı oxuyan şəxsi saxlayıb

[embed]https://www.youtube.com/watch?v=CEpCN1gUWQU&feature=youtu.be[/embed] Rusiya polisi Taleh Bağırov üçün mahnı oxuyan şəxsi saxlayıb Onun Azərbaycana təhvil verilməsi məsələsi həll olunur Rusiyanın hüquq-mühafizə orqanları avqustun 28-də orada yaşayan azərbaycanlı Taleh Orucovu saxlayıb. Bu barədə AzadlıqRadiosuna T.Orucovun yaxınları məlumat verib. Onun DİN-in Baş Mütəşəkkil Cinayətkarlıqla Mübarizə İdarəsinin Rusiyaya müraciəti əsasında saxlandığı bildirilir. Deyirlər ki, o, Azərbaycana təhvil verilib-verilməməsi məsələsinin həlli üçün məhkəmə qarşısına çıxarılacaqdı. Amma, hələlik, məhkəmənin nəticəsi barədə onlarda da xəbər yoxdur. T.Orucovun CM-in 281.1 (hakimiyyətin ələ keçirilməsinə, dövlətin konstitusion quruluşunun zorla dəyişdirilməsinə yönəlik çağırışlar) maddəsiylə təqsirləndirildiyi bildirilir. Ancaq yaxınları deyir ki, gerçək səbəb onun inanclı fəallardan olması və həbsdəki ilahiyyatçı Taleh Bağırova rəğbətidir: “7-8 ay əvvəl Taleh öz adaşına həsr olunmuş mahnı ifa etmişdi. Mahnıda Taleh Bağırovun haqsızlığa qarşı mübarizə aparmasından, zalımlar qarşısında sınmamasından bəhs olunurdu. Mahnı sadə bir klip şəklində sosial şəbəkələrdə yerləşdirilmişdi. Hesab edirik ki, həbsinin səbəbi də budur”. Daxili İşlər Nazirliyindən T.Orucovun saxlanmasıyla bağlı şərh almaq mümkün olmayıb. “Müsəlman Birliyi” Hərəkatının sədri T.Bağırov 2015-ci il noyabrın 26-da Nardaranda ikisi polis, dördü yerli sakin olmaqla, altı nəfərin öldüyü əməliyyat zamanı həbs edilib. Müavini Elçin Qasımov da daxil, təşkilatın xeyli üzvü həbsdədir. Onlar dövlət çevrilişi, terror cəhdi, qanunsuz silah saxlama və başqa maddələrlə 10 ildən 20 ilədək azadlıqdan məhrum ediliblər. Təqsirləndirilən şəxslər razılaşmayaraq, ittihamların saxta olduğunu, DİN Baş Mütəşəkkil Cinayətkarlıqla Mübarizə İdarəsində işgəncələrə məruz qaldıqlarını bildirirlər. Sözügedən idarənin əməkdaşları isə məhkəmədə ifadə verərkən, işgəncə iddialarını təkzib ediblər.